१. भूकम्पको क्षतिपूर्ति अझै हुँदै थियो
विदेशबाट कोरोनाको हल्ला आई दियो ।
२. विश्वभरी कति मरे कति क्वारेन्टाइन
इश्वरको वरदानले हामी बच्न पाएम ।
३. नेपाल आमा मातृभूमि बचाऊ नेपालीलाई
तिम्रो सेवा गर्छौं हामी शरणमा आई ।
४. सरकारबाट हल्ला आयो बसौं घरै भित्र
सारै डर लाग्दो रैछ कोरोनाको चित्र ।
५. मान्छेबाट मात्रै हैन पैसाबाट पनि सर्ने
नयाँ रोग हो उपचार छैन तड्पिएर मर्ने।
६. छोरा छोरी काँ'छन् काँ'छन् आफू घरै भित्र
बाहिर निस्कियो भेट्नु छैन कोहि इष्टमित्र ।
७. लकडाउनको पालन गरी बसौं सबै घर
नेपालमै आइसक्यो लाग्न थाल्यो डर ।
८. सधैं यस्तो नहोला नि कैले सम्म हुन्छ
लाखौँ लाख मरे भन्दा मन कति रुन्छ ।
९. बालवृद्धहरुलाई सर्छ भन्छन पहिला
पुरुष भन्दा कमजोर हुन्छन धेरै जसो महिला ।
१०. सुन्नुहोला दिदीबहिनी सुन्नु दाजुभाई
आफू पनि बच्न सिकौँ बचाउँ अरुलाई ।
११. बाहिर कतै खोज्नु छैन आफू भित्रै शिव
शिव खुसि पार्न सके सुखी हुन्छन जीव ।
१२. मरी जाँदा लगी जाने छैन रैछ केहि
हाँसीखुसी बाँच्न सके राम्रो होला त्यहि ।
१३. नारायणले लगाइदिनु कोरोनाको पार
यति भन्दै बिदा हुन्छु सबलाई नमस्कार ।।
हजुरहरुकै आफ्नै
शोभा सापकोटा
